საზოგადოების წესები
ბოლო განახლება: 2026 წლის 11 ოქტომბერი
მოკლედ: მოიქეცით პატიოსნად და პატივისცემით. ჩვენი მიზანია, რომ ოსტატის სახლში მოწვევა უსაფრთხო და მარტივი იყოს როგორც მომხმარებლისთვის, ისე ოსტატისთვის.
შინაარსი
- ძირითადი პრინციპები
- ყველასთვის
- მომხმარებლებისთვის
- ოსტატებისთვის
- შეფასებები
- მიმოწერა და კომუნიკაცია
- დარღვევის შემჩნევისას
- დარღვევის შედეგები
1. ძირითადი პრინციპები
- პატივისცემა. ყველას პატივისცემით მოეპყარით, მიუხედავად ეროვნების, სქესის, რწმენის, ასაკის, ჯანმრთელობის მდგომარეობისა თუ სხვა ნიშნისა.
- პატიოსნება. პროფილში, მოთხოვნასა და შეთავაზებაში მხოლოდ სიმართლე მიუთითეთ.
- პასუხისმგებლობა. შეასრულეთ ის, რაზეც შეთანხმდით: სამუშაო, დრო და ფასი.
- უსაფრთხოება. საფრთხე არ შეუქმნათ არც საკუთარ თავს, არც მეორე მხარეს და არც სხვებს.
ეს წესები მომსახურების პირობებს ავსებს.
2. ყველასთვის
აკრძალულია:
- სხვისი სახელით ან ყალბი მონაცემებით პროფილის შექმნა, ასევე რამდენიმე ანგარიშის შექმნა შეზღუდვისთვის გვერდის ასავლელად;
- შეურაცხყოფა, დამცირება, მუქარა, შევიწროება, სიძულვილის ენა, სექსუალური ან უხამსი შინაარსის შეტყობინებები;
- უკანონო სამუშაოს ან საქონლის მოთხოვნა თუ შეთავაზება; ძალადობის, ნარკოტიკების, იარაღის ან სხვა უკანონო საქმიანობის ხელშეწყობა;
- სპამი, რეკლამა, მასობრივი შეტყობინებები და OSTATO-ს გამოყენება სხვა სერვისების სარეკლამოდ;
- სხვისი პირადი მონაცემების, ფოტოების ან მიმოწერის გავრცელება მისი თანხმობის გარეშე;
- OSTATO-ს დაცვის მექანიზმების გვერდის ავლა, ავტომატური მასობრივი წვდომა ან გატეხვის მცდელობა.
3. მომხმარებლებისთვის
- სამუშაო სწორად და სრულად აღწერეთ. ატვირთეთ მხოლოდ სამუშაოსთან დაკავშირებული ფოტოები — ადამიანების პირადი ფოტოების გარეშე.
- განათავსეთ მხოლოდ ნამდვილი მოთხოვნა. ნუ გამოიყენებთ OSTATO-ს მხოლოდ ფასების „გასაგებად“ — ეს ოსტატების დროს ფლანგავს.
- ნუ მოითხოვთ სამუშაოს, რომელიც უკანონოა ან რომლის უსაფრთხოდ შესრულება შეუძლებელია.
- ოსტატს სამუშაოსთვის საჭირო პირობები შეუქმენით და შეთანხმებულ დროს დახვდით.
- სამუშაოს დასრულების შემდეგ დაადასტურეთ და შეაფასეთ პატიოსნად. პრობლემის შემთხვევაში გამოიყენეთ „პრობლემა მაქვს“ — შეფასებით ნუ იმანიპულირებთ.
- ნუ დაემუქრებით ოსტატს ცუდი შეფასებით, რომ ფასი დაგიკლოთ ან დამატებითი სამუშაო უფასოდ შეასრულოს.
4. ოსტატებისთვის
- პროფილში მიუთითეთ მხოლოდ ის პროფესია და გამოცდილება, რაც ნამდვილად გაქვთ. ნამუშევრებისა და სერთიფიკატების ფოტოები თქვენი უნდა იყოს.
- შესთავაზეთ რეალური ფასი და მხოლოდ მაშინ, როცა დარწმუნებული ხართ, რომ სამუშაოს შეასრულებთ. შეთანხმების შემდეგ ფასს ნუ გაზრდით, თუ ამის საფუძვლიანი მიზეზი, მაგალითად დამატებითი სამუშაო, არ გაჩნდა.
- შეთანხმებულ დროს მიდით. თუ ვერ ახერხებთ, სამუშაო დროულად გააუქმეთ და მიზეზი მიუთითეთ — გამოუცხადებლობა აზიანებს როგორც მომხმარებელს, ისე თქვენს რეპუტაციას.
- ზუსტი მისამართი, შესასვლელი, ბინა და კარის კოდი მხოლოდ სამუშაოსთვის გამოიყენეთ — ნუ გაავრცელებთ და სხვა მიზნით ნუ გამოიყენებთ.
- იმუშავეთ კანონის შესაბამისად: თუ სამუშაოს ლიცენზია ან უსაფრთხოების ნორმების დაცვა სჭირდება, ამაზე თქვენ აგებთ პასუხს.
- ვერიფიკაციისთვის გამოიყენეთ მხოლოდ თქვენი დოკუმენტი და თქვენი სელფი. სხვისი დოკუმენტის ან ფოტოს გამოყენება აკრძალულია და ვერიფიკაციის მოხსნას ან ანგარიშის შეჩერებას იწვევს.
5. შეფასებები
- შეფასება ნამდვილ გამოცდილებას უნდა ასახავდეს. აკრძალულია ყალბი ან ფასიანი შეფასება, შეფასებების გაცვლა და კონკურენტის დაკნინება.
- შეფასება ანონიმურია — ავტორის „გამოცნობა“ და მასზე ზეწოლა დაუშვებელია.
- ოსტატს შეფასებაზე ერთხელ შეუძლია თავაზიანი პასუხის გაცემა. პასუხში ავტორის პირადი ინფორმაციის გამჟღავნება აკრძალულია.
- შეურაცხმყოფელ, ყალბ ან სამუშაოსთან შეუსაბამო შეფასებასა და პასუხს ვმალავთ.
6. მიმოწერა და კომუნიკაცია
- იყავით თავაზიანი და კონკრეტული. დეტალები (ფასი, დრო, სამუშაოს მოცულობა) მიმოწერაში შეათანხმეთ — დავის შემთხვევაში ეს ჩანაწერი დაგეხმარებათ.
- მეორე მხარეს ნუ გაუზიარებთ პაროლებს, დადასტურების კოდებს ან სხვა საიდუმლო ინფორმაციას.
- მიმოწერას ნუ გამოიყენებთ შეურაცხყოფისთვის, მუქარისთვის ან არასასურველი შეტყობინებებისთვის. ასეთი მომხმარებლის დაბლოკვა ან დარეპორტება მიმოწერიდან შეგიძლიათ.
7. დარღვევის შემჩნევისას
- შეგვატყობინეთ მოთხოვნიდან („პრობლემის შეტყობინება“) ან მიმოწერიდან („მომხმარებლის დარეპორტება“).
- გადაუდებელი საფრთხის შემთხვევაში ჯერ დარეკეთ 112-ზე.
- რეპორტებს ჩვენი გუნდი განიხილავს. დარეპორტებული ვერ გაიგებს, ვინ გამოგზავნა რეპორტი.
8. დარღვევის შედეგები
დარღვევის სიმძიმისა და განმეორების მიხედვით შეიძლება მოხდეს:
- კონტენტის ან შეფასების დამალვა ან წაშლა;
- მოთხოვნის გაუქმება;
- ვერიფიკაციის მოხსნა;
- ანგარიშის შეჩერება (შესვლა და შეტყობინებების გაგზავნა შეუძლებელი ხდება);
- სერიოზულ შემთხვევაში — სამუდამო შეზღუდვა და, საჭიროებისას, სამართალდამცავებისთვის მიმართვა.
თუ ფიქრობთ, რომ გადაწყვეტილება არასწორია, მოგვწერეთ დახმარების გვერდიდან. დამატებით: უსაფრთხოება და ნდობა, კონფიდენციალურობა.
